“HEAL THE WORLD”
Ende, Ema, Ase Ka’e, Wan Koe Eta’n Tu’a, Pang Olo Ngaung Musi,
Ho’o koe de manga wewa wero mata pe’ang mai tana pe’ang. Oooo...rowa hia Mikel Jakison. Hia Mikel hitu ata te pecing da’at agu naun tu’ung eme dere. Manga ca keta dere diha eta minak senget one tilu agu lo’o one pucu. “Heal the World”, nggitu ngasang dere hitu.
Ngong co’o dere “Heal the World”? Ngong pande di’a agu ina’s sangged reu: reu one nai neteng ite, reu one mose cama tau, reu tana lino le pande da’at dite, reo nai de Mori’N le ndekok dite. “Heal the World” hitu one tombo adak dite ngasang “hambor”. One dere hitu tegi agu gesar liha Mikel, oleeee...mai ta! Mai hambor! Hambor agu nai ru! Hambor agu hae ata! Hambor agu tana, poco, golo, bea, wae, tacik, haju, watu, agu sangged kaka tana! Hambor koley agu ise empo agu sangged ised pa’ang be le. Neki one hambor hitu de lite nganceng hambor agu Mori Jari Dedek lino ho’o!
Weong keta nai daku le senget tombo cake tambang one tana dading dite. Tombo cake tambang sale Batu Gosok. Noing laku neho cake agu pande reu lite tuka dading diha ende. Toe bo pande ina reu ata manga’n, maik pande koley lite reu weru. Pande rudak lite tuka de ende ata poli dading ite.
Toe neng manga salang bana te pande di’a mose dite ko?! Toe neng manga widang le Mori’N tana di’a te weri woja, latung, tete, welu, sangged kaut wua, ute, latangt te mose dite ko?! Toe neng manga widang le Mori’N wae agu tacik mese bate penong ikang latang te mose di’a dite ko?! Toe neng manga widang le Mori’N manik naun molas ende dading dite te pande lilek ata tana pe’ang mai lelo lorong nggitu nganceng lite kawe’n mose nai ko?! Toe neng manga widang le Mori’N adak di’a one tana dite te nganceng lite toto’n one ata bana lorong nggitu koley nganceng lite kawen mose nai.
Poli taung widang situ le Mori’N latang di’a mose dite one tana kuni agu kalo. Co’o tara toe cebo gejur sangged widang situ latang te mose dite?! Le lilek gelang bora?! Oleeee... co’o cemoln eme nganceng bora dite, maik pasar beti reu ende dading?! Toe wili cemol le da’at one mose dite ko sangged wa’u dite tai?!
Leso ho’o tegi agu gesar daku, oleee... hau ema bupati agu sangged lawa do, mai cama “heal the world” tana Manggarai. Neka manga koley pande reu. Neka lilek pande saung mbembak ngger eta, maik cake agu kebut lite wake te calar ngger wa one mose dite.
Mai ca nai naid, cama lite dere “Heal the World”.
(semua domba di Keuskupan Anam berdiri dan bersama-sama menyanyikan lagunya Mikel Jakison, “Heal the World” diiringi juk).
Keuskupan Anam, leso Jumak ho’o,
Gabriel Mahal
Tidak ada komentar:
Posting Komentar